Тошковски: Сите во МВР се вознемирени кога гледаат дека некој криминалец се прикривал со униформа
Министерот за внатрешни работи Панче Тошковски денеска порача дека апсењето на членот на обезбедувањето на премиерот Христијан Мицкоски е еден од случаите каде МВР покажува неселентивност во борбата против криминалците во своите редови.
„Многу кривични пријави во минатото се поднесени против криминалците во редовите на МВР, така е постапено и во овој случај. Одделот за внатрешна контрола во рамки на спроведувањето на истрагата по добиени информации во рамки на одделот известил надлежен јавен обвинител кој што се согласил и дал наредба да бидат преземени дејствијата истата вечер. По спроведување на предметната акција, извршени се и повеќе претреси кај полициски службеници исклучиво од страна на Одделот за внатрешна контрола при што се пронајдени одредени докази во насока на стореното кривично дело“, посочи Тошковски.
Тој вели дека граѓаните заслужуваат полиција која ќе ги штити.
„Сакам да им порачам на сите оние недобронамерници и предавници на својот род, имајќи предвид на криминалците во МВР дека неселективно и бескомпромисно ќе се бориме против истите. Македонските граѓани заслужуваат полиција која што ќе ги штити, а не која што ќе ги рекетира. Сите во МВР се вознемирени кога гледаат дека некој криминалец се прикривал со униформа, без разлика дали таа униформа е свечена, тактичка или униформа која што ја носат припадниците на одделот за обезбедување на имот и лица“, рече тој.
Член на обезбедувањето на премиерот Христијан Мицкоски, Ангел Сарамаков, беше уапсен и му беше одреден 30-дневен притвор. Сарамаков, кој е полицаец од 6-тата Управа на МВР, е осомничен за кривично дело „оддавање службена тајна“.
