„ФИЛИПЧЕ Е СЛОБОДЕН, СЕГА И БЕСИМИ И ЕТЕМИ“ Петрушевски жестоко реагираше по одлуката за Модуларната болница
Заменик-генералниот секретар на ВМРО-ДПМНЕ и пратеник Бране Петрушевски денеска остро реагираше на одлуката на Врховниот суд со која беа укинати пресудите за поранешните директори на Клиничката болница во Тетово во случајот со пожарот во модуларната болница и предметот беше вратен на повторно судење.
На прес-конференција, Петрушевски упати политички обвинувања кон претседателот на Врховниот суд Африм Фидани, како и кон лидерите на СДСМ и ДУИ, Венко Филипче и Али Ахмети, оценувајќи дека одлуката претставува тежок удар за семејствата на жртвите во трагедијата.
– Врховниот суд на Африм Фидани, диригиран од Филипче и Ахмети, ги ослободува од вина директорите на Тетовската болница во која се запали модуларната болница. Каков срам за правосудството во Македонија – рече Петрушевски.
Тој потсети дека во претходните судски постапки поранешните директори Флорим Бесими и Артан Етеми најпрво добија казни од по една и пол година затвор, по што Апелациониот суд им ги зголеми казните на по три години затвор.
– Ај што им дадоа на првото судење по една и пол година казна на Флорим Бесими и Артан Етеми, па потоа Апелација им ги зголеми на три години, сега Врховниот суд, предводен од рецидивите на СДС и ДУИ, ги ослободи овие двајца поранешни директори – изјави Петрушевски.
Петрушевски ја доведе во прашање правдата за семејствата на загинатите во пожарот во модуларната болница и повторно упати критики кон поранешниот министер за здравство и актуелен лидер на СДСМ, Венко Филипче.
– Дали е ова правдата која ја чекаа семејствата на загинатите од пожарот во модуларната болница? Филипче, кој како министер не е ни викнат на разговор, а сега на слобода да одат и братот на поранешниот министер за финансии Фатмир Бесими и Артан Етеми? – праша Петрушевски.
Тој додаде дека, според неговата оценка, лицата кои биле најодговорни за условите во кои функционирала модуларната болница сега би можеле да останат на слобода по одлуката на Врховниот суд.
– Филипче е слободен, а сега и Бесими и Етеми ќе му се придружат. Луѓето кои беа најодговорни за пожарот во небезбедната болница и без минимум технички услови за работа, сега поради претседателот на Врховниот суд Африм Фидани ќе шетаат слободни – рече Петрушевски.
На крајот од прес-конференцијата, тој упати и политичка порака кон СДСМ и ДУИ.
– На остатоците на СДС и ДУИ мора да им дојде крај – порача Петрушевски.
Врховниот суд, инаку, на седница одржана на 22 октомври годинава ги уважи барањата за вонредно преиспитување на правосилната пресуда поднесени преку бранителите на осудените, ги укина пресудите на Основниот суд во Тетово и на Апелациониот суд во Гостивар и предметот го врати на повторно постапување и одлучување пред првостепениот суд.
Пожарот во модуларната болница во Тетово се случи на 8 септември 2021 година, кога загинаа 14 лица, а повеќе пациенти беа повредени. Сите загинати биле пациенти заболени од ковид-19.
.
Извор: plusinfo.mk
