Судот на ОН отфрли голем дел од тужбата на Украина против Русија за финансирање тероризам и дискриминација
Највисокиот суд на Обединетите нации денеска отфрли голем дел од тужбата на Киев, кој тврди дека Русија ги финансирала сепаратистичките бунтовници во источна Украина и ја дискриминирала мултиетничката заедница на Крим од анексијата на полуостровот.
Меѓународниот суд на правдата пресуди дека Москва ги прекршила членовите од два договора, за финансирање на тероризмот и за искоренување на расната дискриминација, но отфрли многу од барањата на Киев.
Судот го отфрли барањето на Украина Москва да плати компензација за нападите во источна Украина за кои се обвинети локалните проруски бунтовници, вклучувајќи го и соборувањето на летот на Малезија ерлајнс на 17 јули 2014 година, во кој загинаа сите 298 патници и членови на екипажот.
Иако авионот на Малезија ерлајнс беше соборен од бунтовници поддржани од Москва, Русија негира вмешаност во злосторството. Во ноември 2022 година, холандскиот суд осуди двајца Руси и еден проруски Украинец на доживотен затвор во отсуство за нивната улога во тој напад. Поради соборувањето на авионот, Холандија и Украина ги тужеа Русија и Европскиот суд за човекови права.
Според денешната пресуда на Меѓународниот суд на правдата, Русија прекршила и една од наредбите на судот со тоа што во февруари 2022 година извршила инвазија на Украина.
Правно обврзувачката, конечна пресуда е прва од двете очекувани одлуки на Меѓународниот суд на правдата во врска со деценискиот конфликт меѓу Русија и Украина.
Руските адвокати го повикаа Меѓународниот суд на правдата да ја отфрли тужбата на Украина, велејќи дека дејствијата на проруските бунтовници во источна Украина не претставуваат тероризам.
Судот утврди дека Русија не ги истражила тврдењата на Украина за наводни терористички акти, но ги отфрли сите други тврдења на Киев за прекршување на Конвенцијата за сузбивање на финансирањето на тероризмот.
Тој, исто така, пресуди дека Москва ја прекршила Конвенцијата за елиминација на расната дискриминација со ограничување на училишното образование на украински јазик и задржување на забраната за собранието на Кримските Татари.
