Суарет Алиша за 4ТВ: Од „160 часови асистенција“ во опозиција, до кратење на правата на власт – Министерството стана „асоцијално“
„Не сме експеримент за некој да се игра со нашите судбини. Додека беа опозиција, ДПМНЕ ветуваа двојно повеќе часови за асистенција, а сега ни го ограничија движењето“, вели Алиша во „Ноќно студио“.
Лицата со попреченост во Македонија се чувствуваат изманипулирани од политичките ветувања и нестручноста на институциите. Суарет Алиша од Коалицијата „Менуваме“, во гостувањето на 4TV, упати директна порака до премиерот Христијан Мицкоски и претседателката Гордана Силјановска-Давкова, барајќи итно исполнување на ветеното и законско гарантирање на нивните права.
Алиша со разочарување зборуваше за ветувањата на владејачката партија додека била во опозиција. Тој потсети дека тогашната пратеничка група на ДПМНЕ предлагала зголемување на часовите за лична асистенција од 80 на 160 месечно, но реалноста по нивното доаѓање на власт е дијаметрално спротивна.
„Ни ги скратија часовите и фактически ни го ограничија движењето и социјалниот живот. Не фати онаа клетва – да имаш, па да немаш. Министерството за социјална политика, под водство на Фатмир Лимани, е најслабото во државата. Тоа стана ‘асоцијално’ министерство каде работат луѓе без никакви познавања за попреченоста“, истакна Алиша.
Едно од клучните барања на Коалицијата „Менуваме“ е лицата со попреченост да бидат дефинирани во Членот 9 од Уставот на РСМ. Според Алиша, тоа е единствениот начин нивните права да бидат трајно гарантирани, а не да зависат од волјата на моменталните власти.
Алиша открива дека иако биле најавени покачувања на додатоците за попреченост (10% за деца и 15% за возрасни), тие одлуки „исчезнале“ од страниците на Собранието и Министерството. Тој посочува и на апсурдните контроли во нивните центри.
„Доаѓаат во нашите сервиси и ни наоѓаат замерки за искривени плочки или стари четки, а во самото Министерство за социјална политика лифтовите не работат и нема пристапни тоалети за лица со попреченост. Државата треба да биде огледало, а моментално е хаос“, заклучи тој.
Претставникот на „Менуваме“ најави дека доколку не се оствари средба со премиерот и не се надминат овие проблеми, ќе побараат оставка од министерот Лимани, нагласувајќи дека не може повеќе да се игнорираат специфичните потреби на семејствата каде двајцата родители се со попреченост.
