Стојчевски: Скопје има само седум инспектори на стотици градилишта, безбедноста не е само шлем на глава
Системските пропусти во македонското градежништво се подлабоки од она што се гледа на прв поглед. Во продолжението на разговорот во „Ноќно студио“ на 4ТВ, Борче Стојчевски од здружението „Тутела“ открива фрапантни податоци за недостигот на инспекциски надзор и ниските критериуми за кадрите кои треба да гарантираат безбедност на градилиштата.
Еден од најголемите апсурди во сегашната регулатива е профилот на лицата одговорни за безбедност. Стојчевски алармира дека моментално координатор за безбедност може да биде речиси секој, без соодветна стручна подготовка.
Додека главниот град се соочува со вистински градежен бум, капацитетите за контрола се на критично ниско ниво.
„Ако кажам дека Скопје има само пет до седум инспектори, тука не грешам. Како можат тие да ги посетат сите градилишта кои никнуваат на секој чекор?“, прашува Стојчевски.
Стојчевски посочува дека вината е поделена. Тој поседува бројни фотографии од терен каде се гледа дека работниците ја поседуваат опремата, но не ја користат правилно.
За да се надмине хаосот, „Тутела“ предлага напуштање на моделот каде секој изведувач прави посебен план. Наместо тоа, секое градилиште треба да има еден единствен, ревидиран план кој ќе се следи од ископ до клуч на рака. Клучната новина во предложените законски измени е воведувањето на директна одговорност и за инвеститорот, со што тој веќе нема да биде само набљудувач, туку активен чинител во обезбедувањето сигурни услови за работа. Сите овие решенија, вели Стојчевски, веќе „стојат на компјутер“ во министерството и чекаат политичка волја за реализација.
