„Пратениците одлучија на грбот на децата да прават политика“, рече Велковски за недонесувањето на законот со кој се решаваше проблемот со недостаток на кадар во градинките
Собранието не ги донесе предлог законските измени на Законот за заштита на децата со кој се решаваше проблмот со недостаток на лиценциран стручен кадар во градинките низ Македонија. Министерот вечерва ваквата постапка на пратениците ја нарече „правење на политика врз грбот на граѓаните“.
„Навистина не знам зошто политичарите во парламентот одлучија на грбот на децата да прават политика. Немаше потреба. Луѓево чекаат лиценци од 2021, 2022 година. Денеска се пријавуваат и други, тоа е нормален процес…“, рече во емисијата „10 минути“ на ТВ21 министерот за труд и социјална политика Ѓоко Велковски.
Тој додаде дека бројот на лица кои ги чекаа овие законски измени надминува 1000.
„Веќе не броиме, бидејќи верувајте ако не ги решиме тие од 2021 година кои се дискриминирани за жал, бидејќи пријавените од 2023 година тие полагале, тука е суштинскиот проблем“, додаде Велковски.
Поради ова денеска се соочуваме со недоволен кадар во градинките.
Над 5.000 деца во Македонија се на листите на чекање за згрижување во детска градинка, додека пак над 1.000 лица од 2021 година до сега чекаат да добијат лиценцирање како би го пополниле недостатокот од стручен кадар во градинките во градовите низ Македонија.
Инаку денеска беше последен работен ден на Собранието. Иако тоа е во постојано заседание и по потреба може да биде свикано, сепак пратениците веќе немаат закажано пленарни седници ниту комисии или работни тела.
