ПОСТАВЕН УЛТИМАТУМ, РОКОТ Е ДВА ДЕНА: Земјоделците во Германија го прекинаа протестот, еве ги нивните барања

Протестите на земјоделците во Германија привремено се прекинати по неколкунеделна неизвесност. Претседателот на Здружението на фармери, Јоаким Руквид, рече дека тие се обидуваат да влезат во преговори со федералната влада, но бараат резултати до четврток навечер.

Протестите кои предизвикаа блокади низ Германија од почетокот на 2024 година, кулминираа во понеделникот во Берлин. Се проценува дека учествувале околу 30.000 земјоделци и околу 5.000 трактори оделе по улиците.

„Дојде време да разговараме“, рече Руквид по разговорите со парламентарните групи на тричлената германска коалициска влада.

„Сега би било добро време да ги прекинеме протестите, барем на неколку дена, да им пристапиме на политичарите и да разговараме ориентирани кон решение. Нашиот „молк“ ќе биде сигнал за нашата подготвеност да разговараме“, рече тој.

Германската влада на крајот на декември одлучи да „крати“ одредени планови во буџетот поради недостиг од 17 милијарди евра, меѓу кои беа и субвенциите за земјоделците. Но, поради протестите што следеа, владата веќе отстапи од некои од најавените мерки, како што се укинување на даночните поволности за возила и кратење на субвенциите за земјоделски горива. Но, земјоделците сметаа дека тоа не е доволно и излегоа на протести.

Владата, сепак, гледа „малку простор“ за маневрирање, особено кога станува збор за даноците за гориво.

„Брисел и Берлин го финансираат земјоделството со девет милијарди евра годишно. Како министер за финансии, секогаш морам да се запрашам кои средства се неопходни и кои алтернативи се достапни? Секој треба да го направи својот дел“, рече министерот за финансии Кристијан Линднер.

Руквид и постави на владата еден вид ултиматум – „ни треба резултат до четврток навечер“.

ФОТО:EPA/EFE Filip Singer