Почина Ванчо Богдов, штипски бизнисмен кој својата фабрика „Вабо“ ја даде на работниците

Реномираниот бизнисмен Ванчо Богдов синоќа ненадејно почина во Штип на 62 годишна возраст. Богдов пред две години ја даде својата фабрика „Вабо“ на користење на работниците за тие да менаџираат со неа преку избран менаџмент составен од искусни конфекционери и квалитетни инженери, пренесува „Сдк.мк“.

Од менаџментот велат тие постојано можеле да сметаат на неговата помош. Тие заедно сумирале дека изминатата година ја завршиле успешно со добри и редовни плати, со обезбеден извозен пазар и со успешно стопанисување во услови на енергетска криза.

„Неговите совети беа драгоцени, помошта што ни ја пружаше беше неизмерна. Ни даваше идеи како да ја пребродуваме општата економска криза и како да се справуваме со високите цени на енергенсите. Од него научивме многу, но неговото присуство и неговите предлози секогаш ќе ни недостасуваат. Сите вработени сме во шок. Во знак почит фабриката ‘Вабо’ денешниот и утрешниот ден ги прогласува за денови на жалост и фабриката нема да работи“, вели менаџментот.

Богдов претходно беше претседател на Балканец од Штип, најтрофејниот боречки клуб во Македонија. На еден од пешачките мостови на реката Отиња, каде често пешачел, синоќа го добил првиот срцев удар. Случајните минувачи го реанимирале, го пренеле во болницата каде починал.

Од семејството велат дека Богдов ќе биде погребан утре, а ќе се одржи и опело во црквата „Св. Константин и Елена“.