Пешевски: Автопатот Кичево-Охрид е „бунар без дно“ – парите се пумпаат, плафонот од милијарда евра е пробиен, а крајот не се гледа!
„Граѓаните плаќаат за пат што нема да го возат уште најмалку две до три години. Цените се напумпани до неразумност, а парите наместо во квалитет и кај работниците, завршуваат во нечии туѓи џебови,“ изјави Иван Пешевски, претседател на Синдикатот за градежништво, во емисијата „Ноќно студио“ на 4TV. Како сведок на процесите во секторот веќе 17 години, тој даде сурова анализа за најголемите инфраструктурни проекти во државата.
Кичево-Охрид: Од 525 милиони до пробиен плафон од милијарда
Пешевски потсети дека првичниот договор за делницата од 52 километри изнесувал 525 милиони евра, но со текот на годините сумата вртоглаво расте преку нови и нови задолжувања.
„Напумпани“ цени: 350 милиони евра за само 30 километри?
Синдикалниот лидер изрази сериозен сомнеж во оправданоста на трошоците за новите делници, како онаа од Гостивар до Букојчани.
„Делница од 30 километри да чини 350 милиони евра е класичен пример за напумпана цена. Колку и да е комплексен теренот, ова е сума која покажува дека приоритетот не е граѓаните да стигнат до Охрид за два часа, туку нешто сосема друго,“ алармира Пешевски.
Одговорност – нула!
Она што најмногу загрижува е апсолутното отсуство на одговорност за децениските доцнења и пробивањето на сите буџети.
Прогноза: Ниту за две години нема да има автопат
Пешевски е скептичен дека роковите ќе се испочитуваат, убедувајќи ја јавноста дека ниту за две години проектот нема да биде завршен.
„Ние остануваме неми при уши и слепи при очи. Гледаме како се наплаќа, а не се гради. Без поголеми плати за домашните работници и поголем ангажман на домашните компании, овој автопат ќе остане само скап споменик на неспособноста,“ заклучи тој.
