Одржана воена парада: „Тие се најсилни на светот“
Кинески и руски претставници присуствуваа на воената парада во главниот град на Северна Кореја, организирана по повод 70-годишнината од крајот на Корејската војна.
Пјонгјанг го слави како Ден на победата.
Рускиот министер за одбрана Сергеј Шојгу и членот на Политбирото на Комунистичката партија на Кина, Ли Хонгџонг, застанаа до севернокорејскиот претседател Ким Џонг-ун за време на парадата додека гледаа вежба за напад со беспилотно летало и најновите севернокорејски нуклеарни проектили, објави Ројтерс.
Парадата се одржа синоќа, а за време на прегледот Ким, Шојгу и Ли разговараа, се смееја и поздравуваа додека севернокорејските војници маршираа, покажуваат снимките што ги објавија севернокорејските медиуми. На парадата беа прикажани и најновите севернокорејски интерконтинентални балистички ракети „Хвасонг-17“ и „Хвасонг-18“ за кои се верува дека имаат дострел да погодат цели насекаде во САД, објави британската агенција.
Ким приреди прием и ручек за Шојгу, при што изрази солидарност со рускиот народ и војска, а се разговараше и за стратешката безбедносна и одбранбена соработка на двете земји. Шојгу ја пофали севернокорејската армија како „најсилна во светот“, објави КЦНА.
На друга средба, Шојгу го прочита поздравниот говор на рускиот претседател Владимир Путин, кој и се заблагодари на Северна Кореја за поддршката на Русија за време на специјалната воена операција во Украина.
Говорејќи на парадата, министерот за одбрана генерал Канг Сун-нам ги обвини САД и нивните сојузници за зголемување на тензиите во регионот. Северна Кореја е под санкции на ОН поради нејзината ракетна и нуклеарна програма од 2006 година, вклучително и забрана за развој на балистички ракети.
Во последниве години, Русија и Кина се спротивставија на напорите на САД да воведат нови санкции кон Северна Кореја поради нејзиниот континуиран развој на балистички ракети, тврдејќи дека санкциите треба да се ублажат за хуманитарни цели и дека треба да започнат преговорите со Пјонгјанг.
