Обвинение за обезбедувач на премиерот поради семејно насилство: Ја тепал сопругата пред очите на детето
Основното јавно обвинителство за гонење организиран криминал и корупција (ОЈО ГОКК) поднесе обвинителен предлог против Р.Р., припадник на обезбедувањето на премиерот Христијан Мицкоски. Тој се товари за сторено кривично дело „телесна повреда“ извршено при семејно насилство.
Според наводите на Обвинителството, инцидентот се случил по вербална расправија во семејниот дом. Обвинетиот, иако е лице со полициски овластувања, физички ја нападнал својата сопруга задавајќи ѝ удари во пределот на лицето и главата, а во еден момент се обидел и да ја дави.
Нападот бил извршен во присуство на нивната малолетна ќерка. Како последица на насилството, жртвата се здобила со телесни повреди и силна психичка вознемиреност. Како што се наведува во обвинението, жената успеала да се спаси со тоа што се заклучила во тоалетот.
При обидот да го напушти домот заедно со детето, обвинетиот насилно ѝ го одзел и го оштетил нејзиниот мобилен телефон. Помош и засолниште жртвата побарала кај нивната сосетка.
Заедно со обвинението, Обвинителството до Основниот кривичен суд Скопје достави и предлог за продолжување на мерката притвор. Како главни причини за ова барање се наведуваат:
Министерството за внатрешни работи претходно потврди дека настанот се случил на 2 мај, околу 23 часот. Премиерот Христијан Мицкоски ја потврди информацијата дека обвинетиот е дел од неговото обезбедување, поточно од „претходницата“, појаснувајќи дека станува збор за вработен со кого нема секојдневен контакт.
Мицкоски исто така додаде дека сопругата на напаѓачот е ќерка на негов долгогодишен колега од факултет, нагласувајќи дека законот мора да важи еднакво за сите, без оглед на нивната професија или близина до власта.
