Со 7 милиони евра годишно државата може ефикасно да се справи со семејното насилство
За воспоставување на целосно функционален систем за заштита од родово засновано и семејно насилство, на државата ѝ се потребни околу седум милиони евра годишно. Оваа сума претставува само 0,1 отсто од националниот буџет, покажуваат наодите од „Анализата за трошоци за специјализирани услуги за жртви на родово базирано и семејно насилство“.
Според проф. д-р Катерина Шапкова Коцевска од Правниот факултет „Јустинијан Први“, овие средства би овозможиле исполнување на меѓународните стандарди и Истанбулската конвенција преку:
Истражувањето открива дека голем дел од сервисите кои државата е законски обврзана да ги воспостави, сè уште не постојат или се недоволни. Најкритична е состојбата со бројот на засолништа, центрите за долготраен третман и советувалиштата. Иако Законот за спречување насилство врз жени е донесен во 2021 година, Министерството за здравство сè уште не го воспоставило ветената услуга за жртвите на силување.
Елена Димушевска, извршна директорка на Националната мрежа против насилство врз жени и семејно насилство, нагласува дека средствата постојат во буџетот, но прашање е дали борбата против насилството ќе стане приоритет на Владата.
„Апсолутно ги имаме овие пари. Промената на законот сама по себе не го подобрува системот ако нема алокација на средства за достапна заштита на секоја жена и секое дете на национално ниво“, велат од Мрежата.
Адвокатката Неда Чаловска Димовска посочува дека неисполнувањето на овие обврски претставува директна дискриминација врз жените. Поради тоа, Хелсиншкиот комитет и партнерските организации поднесуваат претставка до Комисијата за спречување и заштита од дискриминација, со цел да ја задолжат државата конечно да ги воспостави потребните сервиси предвидени со закон и меѓународни конвенции.
