Николоски: Поништивме одлука на претходната влада и спасивме 250 милиони евра наменети за Коридорот 8
Вицепремиерот и министер за транспорт, Александар Николоски, во интервјуто за „Ноќно студио“ на 4TV.mk, обелодени дека Владата успеала да спречи обид за енормно поскапување на проектот за Коридорот 8. Станува збор за сума од 250 милиони евра, која била предвидена со одлука донесена во последните денови од мандатот на техничката влада предводена од Талат Џафери.
Николоски појасни дека станува збор за делницата од Гостивар до Букојчани, каде трошоците биле вештачки зголемени непосредно пред промената на власта.
Министерот нагласи дека ваквите примери се доказ зошто планирањето и транспарентноста се клучни. Тој додаде дека сега проектот се одвива со многу поголема динамика, но во рамките на реалните финансиски конструкции.
Николоски заклучи дека со оваа одлука Владата ставила крај на практиката на „неконтролирано одлевање“ на буџетски пари во инфраструктурни проекти и вети дека секој денар потрошен на патиштата ќе биде оправдан со видливи резултати на терен.
