Николоски најави пет нови авиолинии од јуни: Македонија станува регионален центар за керозин

Македонското небо се подготвува за раздвижено лето. Вицепремиерот и министер за транспорт, Александар Николоски, во гостувањето во емисијата „Ноќно студио“ на 4TV.mk, најави дека од јуни се отвораат пет нови атрактивни авиодестинации кои ќе ги поврзат Скопје и Охрид со големите европски центри.

Според најавите, Охридскиот аеродром за првпат ќе добие линија до Виена преку „Austrian Airlines“, а се воведуваат и летови до полските градови Краков и Вроцлав преку „Wizz Air“. Скопскиот аеродром, пак, од јуни ќе биде поврзан со две медитерански дестинации – Палермо (Сицилија) и Алгеро (Сардинија).

Министерот откри дека, и покрај тензиите на Блискиот Исток, Македонија е целосно енергетски обезбедена со авионско гориво и во моментов служи како снабдувачки центар за целиот регион.

Николоски заклучи дека оваа стабилност е клучна за привлекување нови авиокомпании и гарантира дека воздушниот сообраќај во земјава ќе се одвива без никакви прекини и покрај регионалните предизвици.