Николоски: Брза железница до 200 км/час е мојот „животен проект“
Македонија се подготвува за историски пресврт во железничкиот сообраќај. Вицепремиерот и министер за транспорт, Александар Николоски, во интервјуто за „Ноќно студио“ на 4TV.mk, најави реализација на проектот за изградба на брза пруга на Коридорот 10, на која возовите ќе достигнуваат брзина од 200 километри на час.
Николоски овој проект го нарече своја најголема професионална амбиција и стратешки потег кој на земјата ќе и го врати геостратешкото значење во регионот. Проектот се развива во рамки на стратешко партнерство со Велика Британија, од каде веќе се ангажирани врвни светски компании за подготвителните студии.
Според предвидувањата, патувањето од Скопје до Атина со новата пруга би траело околу 5 часа. Николоски нагласи дека карго сообраќајот би можел да биде оперативен веќе во 2028 или 2029 година, додека целосната пруга за патнички возови би била функционална до 2031 година.
Министерот откри дека веќе се преземаат чекори за набавка на нови возови и локомотиви кои ќе ги следат техничките перформанси на новата пруга.
