Николоски: Автопатот Прилеп – Битола ќе го скрати патувањето до Атина за три часа и ќе го заживее Пелагонискиот регион

Изградбата на автопатската делница Прилеп – Битола не е само локално инфраструктурно решение, туку стратешки проект кој целосно ќе ја промени економската мапа на Македонија. Вицепремиерот и министер за транспорт, Александар Николоски, во интервјуто за „Ноќно студио“ на 4TV.mk, истакна дека оваа делница по 30 години чекање конечно станува реалност.

Делницата Прилеп – Битола е дел од паневропскиот Коридор 10д, кој претставува клучна алтернатива на главниот Коридор 10. Со неговото завршување, поврзаноста со јужниот сосед ќе добие сосема нова димензија.

Министерот најави дека динамиката на терен е веќе засилена и граѓаните набрзо ќе ги видат првите резултати на оваа „инфраструктурна траума“, како што тој ја нарече тридецениската стагнација во овој регион.

Дополнително, Николоски најави дека Владата работи и на идејни решенија за поврзување на делницата од Фариш до Прилеп, со што целиот потег би бил целосно автопатски поврзан со Скопје и остатокот од државата.