КОЈ Е ПОДГОТВЕН ДА ИНВЕСТИРА ВО ОБЈЕКТ НА ПОПОВА ШАПКА?! Еве што може да купите преку комерцијалните банки
Дуќани
во Градскиот трговски центар во Скопје, дуќани низ повеќе градови во
Македонија, но и други типови на деловни објекти, како некогашни фарми,
живнарски, свињарски, или пак делови од машински работилници, поранени хотели….
Ова се само дел од бројните деловни објекти кои се нудат на продажба од страна
на домашните комерцијални банки.
Деловниот
имот кој го продаваат банките е објавен на нивните веб страни, и најчесто
станува збор за различни типови на градби во кои некогаш се вршела дејност, но
сега се трага по нови сопственици.
Еден
примамлив имот нуди Халк банка, која продава деловни простории на Попова Шапка.
Сместен во Пашина Ливада над Хотел Славија и хотел Бора во близина на
Институтот за Екологија и Техонологија на Попова Шапка, на приближно 20 километри
од центарот на Тетово. Имотот има кат, приземје и подрум, со приклучоци за
комунална, водоводна, канализациона и електрична инсталација. Греењето е
сопствено централно топловодно на нафта со инсталирани радијатори, а се продава
преку извршител. Цената по која е огласен овој имот надминува 100 илјади евра,
или поточно за него се потребни 143.432 евра со вклучен ДДВ.
Стопанска
банка Скопје пак продава целосно изградено објект на три ката, административна
зграда со магаци и изложбен салон со вкупна површина од 1.316 метри квадратни и
земјиште со паркинг кое се протега на површина од 1.185 метри квадратни. И овој
имот се продава преку извршител, а се наоѓа во околината на главниот град.
На
листата на имоти кои ги продава Комерцијална банка е деловен објект кој некогаш
служел како фабрика за производство на плочки. Зградата во која некогаш се
произведувале плочи е сместена во скопско Орешани, но нема имотен лист и зафаќа
површина од 1.529 метри квадратни, а за него банката побарува 27.718.330 денари.
Освен во
споменатите понуди, и кај други банки од земајва може да се најдат бројни
деловни објекти, некогашни производствени сали, но и недовршени објекти кои
биле во план да станат деловна зграда.
На долгите листи
на банките може да се најдат и продавници, често се забележува дека се
продаваат дуќани од ГТЦ во Скопје, но и куќи, станови, земјиште со различна
големина.
Прегледот
на понудата на банките покажува дека има голем избор на објекти, но многу
повеќе се деловните објекти кои се нудат на продажба. Забележливо е што дел од банките имаат куќи кои се
со голема квадратува и истите се подолг период на продажба.
Банките се
одлучуваат да стават имоти на продажба само како крајно решение. Најчесто тоа е
резултат на неможноста на сопствениците навреме да ги вратат земените кредити
во банката, кои потоа се одземени поради ненаплатени кредити и сега се нудат на
продажба.
Недвижностите
кои се продаваат од страна на банките во нашата земја според упатените не
спаѓаат во имот кој лесно се продава. Се случува дел од објектите да чекаат
години додека да добијат нови газди, па имотите стојат на списоците на банките
подолг период.
За
оние кои сакаат да купат имот или деловен објект по пониска цена, ќе мора да се
потрудат во пребарувањето. Секоја банка на својата веб страна има список или
листа од недвижнини кои ги продава.
П.О.
