Димитровски: Уставни измени само со гаранции за идентитетот и реципроцитет за Македонците во Бугарија
Заменикот-министер за надворешни работи и надворешна трговија, Зоран Димитровски, од собраниската говорница порача дека Бугарите ќе бидат впишани во Уставот дури откако државата ќе добие цврсти гаранции дека билатералните прашања нема да се користат за нови вета на евроинтеграцискиот пат.
Одговарајќи на пратеничко прашање од Јованка Тренчевска (СДСМ), Димитровски подвлече дека клучните услови на новата Влада се засноваат на достоинство и предвидливост на процесот.
Димитровски истакна дека е неопходна „подадена рака“ од Софија, особено во однос на правата на Македонците во Бугарија. Тој потсети на бројните пресуди од Судот во Стразбур кои Бугарија ги игнорира, додека истовремено бара впишување на бугарската заедница во македонскиот Устав.
Според Димитровски, интензивната дипломатска активност на новата Влада вродила со плод кај европските пријатели.
„На многу адреси во Европа веќе е разбирливо дека Македонија мора да има предвидлив пат кон Унијата, ослободен од идентитетски и билатерални вета. Тоа го разбираат и претседателот на Европскиот совет и високи претставници како Антонио Кошта“, изјави Димитровски.
Тој додаде дека дури и албанскиот партнер во Владата, коалицијата „Вреди“, смета дека барањето гаранции е разумен и логичен потег.
За решавање на овој децениски проблем, Димитровски смета дека е потребен дијалог со новата стабилна влада во Бугарија, но пред сè – внатрешен политички консензус.
„Нашата цел е откочување на процесот на достоинствен начин, без историските комисии и наративи да бидат пречка за европската иднина на нашите граѓани“, заклучи Димитровски.
