Цеков: Пратениците нарачуваат од „Тему“ додека се гласаат закони, потребни се отворени листи за квалитетна дебата
„Собранието не смее да биде само ‘проточна лента’ за законите на Владата“, вели независниот пратеник Миле Цеков. Тој алармира за ниското ниво на дебата и смета дека промената на изборниот модел е единствениот начин да се врати достоинството на пратеничкиот мандат.
Независниот пратеник Миле Цеков, кој неодамна ја напушти пратеничката група на ЗНАМ, во гостувањето во емисијата „Ноќно студио“ упати остри критики до своите колеги во законодавниот дом, посочувајќи дека Собранието ја губи својата суштинска дебатна функција.
Цеков истакна дека перцепцијата за пратеникот во јавноста е на ниско ниво, главно поради незаинтересираноста на дел од избраниците за содржината на законите за кои гласаат.
„Им сугерирам на моите колеги, додека траат пленарните седници, да не седат цело време на телефоните, да не нарачуваат од ‘Тему’ и да не скролаат на Инстаграм и Фејсбук. Треба да се посветат на законите, бидејќи има пратеници кои, ако ги прашате, воопшто не знаат зошто гласаат“, изјави Цеков.
Според него, моменталната ситуација во која извршната власт само ги поднесува законите, а Собранието ги прифаќа како на „лента“, се должи на лошиот изборниот модел.
Цеков смета дека квалитетот на пратениците зависи исклучиво од начинот на кој тие се избираат. Тој посочи дека сегашниот модел им дава моќ на партиските лидери и тесното раководство да ги кројат листите според послушност, а не според квалитет.
За разлика од многу негови колеги кои по изборите се изолираат во главниот град, Цеков нагласи дека како пратеник од четвртата изборна единица останува во постојан контакт со својата база во Струмица и југоистокот.
„Јас не останувам во Скопје. Секојдневно сум со моите сограѓани и ги слушам нивните реални проблеми. Тоа е единствениот начин да се оправда довербата на народот“, вели тој.
Пратеникот се осврна и на состојбите во правосудството, нагласувајќи дека граѓаните чувствуваат дека правдата не е еднаква за сите. Неговиот став е дециден – секој што се огрешил пред законот мора да одговара, без разлика дали е дел од власта или опозицијата.
Како независен пратеник, Цеков најави дека неговиот глас ќе биде исклучиво во интерес на граѓаните. „Ќе поддржам сè што е добро. И додека бев дел од мнозинството, поддржував предлози и од Левица и од СДСМ доколку беа во интерес на народот. Така треба да се однесува еден одговорен пратеник“, заклучи Цеков.
