Цеков најавува Закон за потекло на имот: „Крај за семејните стебла во правосудството и неказнивоста“
„Додека правдата е бавна за моќниците, граѓаните секојдневно ја губат довербата во системот“, вели независниот пратеник Миле Цеков. Тој бара итен ветинг по албански модел и закон со кој ќе се испита имотот на секој функционер.
Во продолжението на своето гостување во емисијата „Ноќно студио“ на 4ТВ, независниот пратеник Миле Цеков упати сериозни обвинувања за селективна правда во Македонија, прашувајќи кој во изминатите две години понел вистинска одговорност за високата корупција.
Цеков директно ги посочи случаите кои ја брануваат јавноста, а за кои смета дека правдата доцни или воопшто ја нема.
„Граѓаните се најголемиот суд и тие пресудуваат секој ден кога гледаат дека правдата не важи за сите. Кој понесе одговорност за петте тони марихуана? Кој ќе одговара за Артан Груби? Сметам дека правдата е премногу бавна и за Кочани. Ова не се само флоскули, туку легитимни прашања кои народот ми ги поставува секој ден“, истакна Цеков.
Според него, покрај платите и животниот стандард, борбата против криминалот и корупцијата е најважното прашање за опстанокот на државата.
За да се стави крај на декларативните заложби, Цеков најави конкретна иницијатива во Собранието – донесување на Закон за потекло на имот.
Најострите критики пратеникот ги упати кон состојбите во судската власт, посочувајќи на аномалии кои, според него, се незамисливи за една западна демократија.
„Недозволиво е во 21 век да имаме пракса каде таткото е судија, ќерката обвинител, синот адвокат, а сопругата народен правобранител. Најголемиот проблем произлегува токму од овие семејни врски во правосудството“, дециден е Цеков.
Како решение за овој „затворен круг“ на влијанија, тој предлага целосен ветинг на судиите и обвинителите, по примерот на моделот кој веќе се спроведува во Албанија. Цеков смета дека без радикално чистење на системот од лични и семејни интереси, реформската агенда ќе остане само мртва точка на хартија.
