Започна „GENERALKA WEEKEND“ – илјадници волонтери чистат

Со голема масовна акција за чистење денес официјално започна регионалната еколошка иницијатива „GENERALKA WEEKEND“, која оваа година ги обединува десетици илјади волонтери низ цела Македонија.

Во акцијата учествуваат 80 општини, над 600 организации, јавни институции, приватни компании и повеќе од 250 државни институции, што ја прави една од најголемите еколошки активности во регионот.

Централниот настан се одржа во Скопје, каде присуствуваа претседателката на државата Гордана Силјановска-Давкова, Рози Мицкоска, амбасадорот на Австрија Мартин Памер, министерот за животна средина и просторно планирање Муамер Хоџа, заменичката министерка Ане Лашкоска, како и бројни претставници на институции, организации и граѓани.

Од Град Скопје порачаа дека акцијата испраќа силна порака за заедничка одговорност во зачувување на животната средина и истакнаа дека секој граѓанин има улога во создавање почист град.

Градските власти нагласија дека Скопје, како главен град, мора да биде уредено и достоинствено место за живеење, при што службите и јавните претпријатија секојдневно работат на терен во повеќе смени за одржување на јавната хигиена.

Акцијата истовремено се реализира на над 500 локации низ целата држава, што претставува значаен организиран еколошки потфат.

Во наредниот период е најавена и кампања за подигнување на јавната свест за правилно одлагање на отпадот, со цел да се намали загадувањето на јавните простори.

Од Град Скопје упатија апел до граѓаните за поголема одговорност и активно учество во зачувување на животната средина.

„Само заедно може да се изгради град каков што заслужуваат граѓаните – чист, уреден и достоинствен главен град“, порачаа од Град Скопје.