Во Израел пронајдени 1.500 тела на борци на Хамас

Израелската армија утринава соопшти дека пронашла околу 1.500 тела на борци на Хамас во Израел од почетокот на офанзивата на палестинското исламистичко движење од Појасот Газа во саботата, пренесе АФП.

Претходно, Израел објави 900 загинати воени и цивили, а палестинските власти објавија 700 смртни случаи во Газа и на Западниот Брег.

Како одговор на палестинскиот напад, Израел изврши воздушни напади врз Појасот Газа. Портпаролот на израелската армија изјави дека Палестинците бегаат од Појасот Газа во Египет, кој исто така се граничи со енклавата. „Контролниот пункт Рафа сè уште е отворен“, рече потполковникот Ричард Хехт. „Секој може да замине. Би ги советувал да си заминат“, додаде Хехт, цитиран од Ројтерс.

Според него, евакуацијата на цивилите од 24 населени места лоцирани во близина на Појасот Газа е речиси завршена. Хехт рече и дека борците на Хамас не навлегле на израелска територија од синоќа, но прецизираше дека се уште не е исклучена можноста за инфилтрации.