Сведокот Трифунов: Билетот за ДНК во „Пулс“ чинеше 500 денари, но фискална сметка не добив!
Во продолжението на судскиот процес за пожарот во кочанската дискотека „Пулс“, денеска во фокусот беа исказите на сведоци кои поради престој во странство не се достапни за директно сослушување, а нивните изјави беа прочитани во судницата.
На рочиштето беше разгледана и процедурална забелешка од одбраната на првообвинетиот Дејан Јованов, откако неговата адвокатка побара исклучување на јавноста. Барањето следува по реакциите од минатото рочиште, кога дел од родителите на загинатите 63 млади лица, по предлогот за укинување на притворот, извикувале: „Пуштете го газда Деко, ние ќе му пресудиме“. Одбраната тврди и дека ваквите реакции не биле внесени во записникот.
Судијката Дијана Груевска-Илиевска го одби барањето за исклучување на јавноста, посочувајќи дека во оваа фаза нема основ за таква мерка, но додаде дека по потреба може да се пристапи кон поединечни исклучувања. Таа нагласи дека сите забелешки, без разлика од која страна доаѓаат, се нотираат согласно судската постапка.
Во судницата беа прочитани исказите на сведокот Дарио Трифунов, кој според изјавата дадена пред обвинителството, често посетувал „Пулс“ и уште како малолетник. Тој навел дека во објектот имало голем број малолетни лица, дека се забележувала нелегална продажба на дрога и дека, по реновирање, објектот имал само еден влез и излез. Во неговата изјава се наведува и дека не добил фискална сметка за билетот за концертот на групата ДНК, кој чинел 500 денари.
Трифунов во исказот опишал и хаотични сцени за време на пожарот. Според неговите зборови, полицијата влегла пред да се активираат пиротехничките ефекти, а потоа почнал да се шири чад и да паѓа дел од таванот. Тој навел дека со друштвото излегол надвор и видел повредени млади лица кои излегувале од објектот, дел од нив со тешки изгореници. Во неговата изјава се наведува и случај во кој полицаец им кажал повредено лице да го транспортираат со сопствено возило, без да укаже помош.
Се читаше и исказот на сведокот Александра Пепеларовска, која опишува дека изгубила свест во ходникот, каде имало голема гужва и паднати лица едно врз друго. Таа навела дека се чувствувал силен мирис на изгорена пластика, а надвор имало амбулантни возила и полициско присуство. Според нејзиниот исказ, поради недостиг на кислород и хаосот на теренот, не добила веднаш помош, по што подоцна била хоспитализирана и лекувана во Скопје и во странство.
Судењето продолжува со сослушување на вештак од Институтот за судска медицина, кој треба да одговори на дополнителни прашања поврзани со претходно презентираните обдукциски наоди и медицинска документација за 63-те загинати и над 200-те повредени лица.
