Стартува масовна контрола на лиценцираните производители на медицински канабис
Министерот за здравство, Азир Алиу, денеска најави почеток на обемна акција за контрола на сите компании кои имаат лиценца за производство на медицински канабис во државата. Тимови на МВР и инспектори веќе се на терен и го проверуваат работењето на сите 43 лиценцирани субјекти.
Алиу посочи дека досегашните контроли покажуваат сериозни пропусти во работењето на Меѓуресорската комисија за контрола, формирана во 2017 година. „Додека трае оваа прес-конференција, колегите се на терен. Ќе мора да се проверат сите 43 лиценци. Меѓуресорската комисија била креирана во 2017 година, а не најдовме ниту еден извештај од нејзината работа, иако таа е клучна за да имаме увид што се случува со производството на канабис“, изјави Алиу.
Министерот најави дека проверките ќе се спроведат систематски и транспарентно, а резултатите ќе бидат јавно објавени. Акцијата е дел од заложбата на Министерството за здравство да обезбеди целосна контрола и регулација на индустријата за медицински канабис, со цел законитост и безбедност на производството.
