Клиничкиот центар „Мајка Тереза“ ќе добие смарт паркинг со апликација, сензори и хортикултурно уредување

Деценискиот проблем со паркирањето во Клиничкиот кампус „Мајка Тереза“ конечно ќе добие трајно решение, откако Владата во вторникот донесе одлука за правна рамка за проектот, истакна министерот за здравство Азир Алиу. Со одлуката се овозможува потпишување на 15-годишен договор со Градот Скопје, со закупнина од 10 отсто од вкупниот промет, по што градот ќе започне со проектирање и изградба на катни гаражи и инфраструктурно уредување на просторот.

Проектот, како што појасни Алиу, ќе предвидува комплетен мониторинг на паркирањето и дигитален водич за граѓаните, хортикултурно уредување на просторот, паметен паркинг систем со сензори за детекција на слободни паркинг места, мобилна апликација, поврзување со фискален систем,

„Времето на одложување на проблемите заврши, ова е нова култура – на одговорност. Нашата визија е здравството да функционира и во логистиката, а денес го правиме токму тоа. Со години илајдници луѓе лекувањето го почнуваа со нервоза и неизвесност. Пациентите заслужуваат ред, достоинство и функционален систем“, изјави Алиу на прес-конференција.

Министерот подвлече дека со оваа одлука се решава долгогодишниот проблем со паркирањето и се отвора патот за негово трајно и функционално уредување.

„Ова го најавивме како еден од приоритетите на Министерството за здравство. Со последната владина одлука, прашањето со паркингот добива јасна институционална рамка и се отвора патот за негово трајно решавање“, додаде Алиу.