Спасовски: Само две недели не делат, ќе помогнеме младите да ги спакуваат куферите или ќе ги засукаме ракавите, и Европа ќе ја донесеме тука!
Носителот на листа на кандидати за пратеници од Изборна единица 2, предводена од СДСМ и „Коалицијата за европска иднина“, Оливер Спасовски денеска на прес конференција порача дека само две недели не делат од големата одлука.
„Само две недели не делат од големата одлука, од изборот меѓу надеж и безнадежност, меѓу просперитет и зачмаеност во минатото, меѓу интеграција и целосна изолација. Затоа овие парламентарни се исклучително важни, ги повикувам граѓаните со посебна одговорност да ја определат иднината на нашата татковина. Одговорност која ја имаме кон нашите претци, кон нас самите, а посебно кон нашите деца. Дали ќе им помогнеме да ги спакуваат куферите давајќи им карта во еден правец кон некоја одредница како резервна татковина или ќе ги засукаме ракавите да го завршиме започнатото и Европа да ја донесеме тука“, вели Спасовски.
Тој вели дека сега е време за имплементирање на европските стандарди во секој сегмент од општеството што би донело многу за секој од нас.
