Самостојните уметници реагираа за доцнењето на исплатите, Министерството вели средствата ќе легнат утре
Самостојните уметници реагираат на повеќемесечното доцнење на исплатите за 2026 година, оценувајќи дека проблемот станува неодржлив и дека институциите повторно ги оставаат без навремена финансиска поддршка.
Во отворено писмо испратено до Министерството за култура и туризам и министерот Зоран Љутков, тие посочуваат дека со години наназад се соочуваат со истиот проблем – доцнење на исплатите, поради што самите мораат авансно да ги покриваат трошоците кон Управата за јавни приходи за да избегнат долгови, камати и прекин на здравственото осигурување.
„Иако секоја година покажуваме трпение и разбирање, состојбата веќе станува неодржлива. Самостојните уметници повторно се доведени во ситуација сами да ги покриваат придонесите“, се наведува во писмото.
Тие реагираат и на, како што велат, неусогласените информации што ги добиваат околу роковите за исплата, додека во меѓувреме се соочуваат со опомени од УЈП, блокирани сметки и неизвесност.
Според уметниците, конкурсот за доделување месечни надоместоци се распишува во ноември, но резултатите ги добиваат дури кон крајот на март, кога веќе пристигнуваат првите опомени за неплатени обврски за јануари и февруари. И покрај тоа што веќе е мај, првата исплата сè уште не била реализирана.
По реакциите, од Министерството за култура и туризам соопштија дека средствата за самостојните уметници за 2026 година се веќе исплатени и дека ќе бидат достапни на нивните сметки во текот на утрешниот ден.
„Доцнењето настана поради дополнителни усогласувања и проверки во постапката на пресметка и координација со надлежните институции, со цел исплатата да биде реализирана согласно важечките законски и финансиски прописи“, наведуваат од Министерството.
Оттаму додаваат дека остануваат посветени на навремено и континуирано исполнување на обврските кон самостојните уметници, како и на изнаоѓање системски решенија за да се избегнат вакви ситуации во иднина.
