Први пресуди за пожарот во „Пулс“: Условни казни за тројца полицајци
Основниот кривичен суд во Скопје донесе првостепена пресуда поврзана со пожарот во дискотеката „Пулс“ во Кочани. Тројца полициски службеници се осудени на условни затворски казни за злоупотреба на службената положба и овластување.
Според пресудата:
Казните нема да се извршат доколку осудените во наредните четири години не сторат ново кривично дело. На објавувањето на пресудата не присуствуваше ниту еден од обвинетите.
Судијката Лидија Петровска истакна дека полицајците ги вршеле контролите само формално, создавајќи „привид на правна заштита“. Судот утврди дека обвинетите постапиле спротивно на своите обврски при контролата на угостителските објекти.
„Обвинетите своите службени должности ги извршиле само привидно. Формата била запазена, но суштината изостанала. Формалното постапување што не води кон резултат не претставува извршување на должноста, туку нејзино неизвршување“, нагласи судијката Петровска.
Судот при одмерувањето на казната ги зеде предвид олеснителните околности: фактот што обвинетите не се претходно осудувани, тие се семејни луѓе и нивните конкретни дејствија немале директна причинско-последична врска со избувнувањето на пожарот.
Катастрофалниот пожар во дискотеката „Пулс“ се случи на 16 март 2025 година. Во оваа трагедија животот го загубија 63 млади луѓе, а повеќе од 200 беа повредени. На оваа пресуда е дозволено право на жалба до Апелациониот суд во Скопје.
