Осум часа по пожарот цело Скопје смрди на чад

Скопје и неколку часа по денешниот пожар во Шуто Оризари сè уште е под влијание на непријатна миризба што се шири во воздухот. Иако огнот е ставен под контрола уште напладне, граѓаните реагираат дека чадот и мирисот се чувствуваат и во вечерните часови.

Пожарот бил пријавен денеска околу 11:30 часот преку бројот 112, а се однесувал на запалена машина за мелење железо на улица 1675 број 24 во општина Шуто Оризари. На терен веднаш интервенирала Бригадата за противпожарна заштита на Град Скопје со две противпожарни возила.

Според информациите од Регионалниот центар за управување со кризи (РЦУК) Скопје, во 12:03 часот било потврдено дека пожарот е ставен под контрола и нема опасност од негово понатамошно ширење. Како што информирал градоначалникот на Шуто Оризари, локацијата каде што избувнал пожарот е оградена со ѕидови, што дополнително помогнало во спречување на проширување на огнената стихија.

Сепак, и покрај брзата интервенција, до 20 часот граѓаните од различни делови на градот пријавуваат дека во воздухот сè уште се чувствува мирис на изгорено, што отвора прашања за квалитетот на воздухот и можните последици.

Надлежните институции засега немаат издадено дополнителни предупредувања, но се очекуваат повеќе информации во текот на вечерта.