Огнен Јанески се збогува со гледачите: Денеска беше последната емисија!
Новинарот Огнен Јанески вечерва преку друштвената мрежа Фејсбук се збогуваше со гледачите и емисијата „Очи в очи“ која се емитуваше 10 години во македонскиот медиумски етер.
По 10 години во оваа емисија, а 15 години откако започнав да водам контактни емисии, време беше една оддишка да се земе од нив и да се одмори од фразите ,,Ве молам, намалете го тонот на телевизорот” и ,,Зборувајте на темата”.
Што сè не поминавме заедно во емисијата #ОчиВОчи – од најпозитивниот до најнегативниот екстрем. Од најголемите среќи и најдлабоките таги, споделени по сите основи – лично мои, лични од гледачите, општествено важни и животопроменувачки.
Не мислев дека дотолку ќе се вгнезди еден ваков формат на емисии, но, циклусот на кругот на животот треба да се затвори како што и започнал. Најголемите умови во историјата рекле дека треба да знаете кога да се повлечете при успехот, и можеби времето за некого е задоцнето, но, секој си го следи својот пат.
Телевизија 24, преку оваа емисија обезбеди стандарди за гледачите кои претставуваа сè што нашето општество е. И токму тоа беа едноставните причини за постоењето на емисијата – почитување, слушање, коментирање, фокусирање и одржување.
Ви благодарам што емисијата ја направивте да биде на тој пиедестал на кој вие ја поставивте, и што ми бевте водилки во текот на моето битисување низ неа.
Денеска, 10 и пол години подоцна, а 10 ефективни за мене, конкретно од оваа емисија се одјавив, а и јас си дадов за право да си го кажам своето мислење (иако повеќе од две минути) наспроти тоа што секогаш велев дека е неважно моето, и тоа е за гледач(к)ите.
P.S. Денеска ја носев истата пеперушка како во првата емисија. Кошулата не е истата оти сум здебелен, ама е истата боја. Коса немам, а ни очила, ама брадата ме вади. Фотките се од првата и од последната емисија.
