Нови осомничени во истрагата за трагедијата во „Пулс“ – вработени од УЈП и Пазарниот инспекторат под сомнение за корупција и фалсификати
Обвинителството во рамки на истрагата за трагедијата во кочанската дискотека „Пулс“ покрена постапки против повеќе лица поврзани со корупција, злоупотреби и фалсификување документи.
Дел од осомничените се лишени од слобода, а за неколкумина обвинителството, според информациите на МКД.мк, ќе бара и мерка притвор. Се работи за лица вработени во Управата за јавни приходи и Државниот пазарен инспекторат.
Според МКД.мк, притвор ќе биде побаран за Драганчо Паунов од Штип, вработен во УЈП Штип, осомничен за примање поткуп (чл. 357) и оддавање службена тајна (чл. 360). Тој веќе е лишен од слобода. Притвор ќе биде побаран и за неговиот колега Дуле Димитриев, исто така од Штип, осомничен за примање поткуп (чл. 357) и примање награда за противзаконито влијание (чл. 359).
Осомничен за давање поткуп (чл. 358) и давање награда за противзаконито влијание (чл. 358-а) е Михаил Јованов. Постапка е покрената и против Драган Чурлинов од Гевгелија за злоупотреба на службена положба (чл. 353) и фалсификување службена исправа (чл. 361).
Атанас Чурлинов од Гевгелија, вработен во УЈП Струмица, е сомничен за истите две дела – злоупотреба на службената положба и фалсификување службена исправа. Лишен е од слобода, како и Алки Караманолев од Струмица, исто така вработен во УЈП, осомничен за истите кривични дела.
Постапка се води и против Александра Чичанова од Валандово, вработена во УЈП Струмица, за злоупотреба на службена положба и фалсификување службена исправа. Во УЈП Штип е осомничен и Никола Тушев, лишен од слобода за злоупотреба на службената положба, како и Александар Кангалов од Штип, кој исто така е приведен.
Според МКД.мк, лице со иницијали В. К. од Кочани е осомничено за оддавање службена тајна (чл. 360), а во случајот „Пулс Кочани“ за фалсификување исправа (чл. 378 ст. 4) осомничен е и Д. Ј.
Обвинителството продолжува со прибирање докази во рамките на проширената истрага. Вчера започна судскиот процес против 35 физички и три правни лица обвинети за трагедијата во „Пулс“, а паралелно се води и постапка против 13 полициски службеници, за кои обвинение се очекува следниот месец.
