Зголемен водостојот на Вардар, Радика и Треска, претпазливо движење!
Се уште е висок водостој во горниот дел од сливот на река Вардар, а очекувано зголемен е водостојот во средниот и долниот тек од течението на реката.
Останува висок и водостојот во сливот на река Радика со нејзините притоки, а во текот на денов зголемувања на водостојот има и на река Сатеска.
Исто така, зголемен е водостојот на река Треска каде единствено е можно слабо локално излевање на реката околу местоста Пласница, но без притоа да предизвика материјални штети.
Зголемен е и водостојот на река Црна каде нема опасност од излевање на реката. Во сливот на река Пчиња е забележано зголемување на водостојот во долниот дел од сливот без опасност од излевање.
Во опаѓање е водостојот на река Лепенец и таму полека се стабилизира состојбата. Во сливот на река Струмица и во горниот дел од сливот на река Брегалница има благо зголемување на водостојот без опасност од излевање на реките.
До крајот на денот се очекува зголемување на водостојот во долниот дел од сливот на река Вардар, но без опасност од излевање на реката во тој дел.
Исто така висок ќе остане водостојот и во сливот на река Радика, река Сатеска и река Треска. На останатите водотеци низ земјава се очекува стагнација на водостоите или нивно благо намалување.
Поради се уште високите води во дел од речните сливови предупредуваме на претпазливо движење покрај реките и суводолиците во текот на денешниот ден.
