Битиќи: Владата се движи кон автократски модел и не остава простор за поинакво мислење
Екс-вицепремиерот за економски прашања, Фатмир Битиќи, во интервју за емисијата Ноќно студио на 4TV.mk упати остри критики кон актуелната влада, оценувајќи дека земјата се движи во насока на автократско управување.
„Би кажал дека имаме автократска влада, влада која сака да ја задуши слободата на говор и да врши политички прогон врз неистомислениците. Ако продолжи вака, не знам каков режим имале во Иран, не сум живеел таму, но сме гледале и слушале“, изјави Битиќи.
Тој направи споредба со, како што рече, периодот на владеење на ВМРО-ДПМНЕ во минатото, нагласувајќи дека не би сакал земјата да се врати во, според него, „времето на режим“.
„Добро се сеќавам на еден лидер на ВМРО-ДПМНЕ кој ни приреди режим во нашата земја. Не би сакал да се вратиме во тоа време. По мене, постои сличност во стилот на владеење. Наместо по неколку години власт да се појават тие тенденции, сега тие се применуваат уште од почетокот“, рече Битиќи.
Според него, сите индикатори покажуваат дека актуелната власт не е подготвена да остави простор за луѓе со различно мислење, иако, како што нагласи, тие може да имаат иста цел – подобрување на условите за живот во државата.
Во однос на споредбите со политички системи како оној во Иран, Битиќи посочи дека конечната оценка секогаш ја даваат граѓаните.
„Ние можеме да правиме паралели врз основа на тоа што сме слушале и гледале, но на крајот граѓаните се тие кои најдобро оценуваат и прават споредби“, истакна тој.
Битиќи предупреди дека, доколку продолжи ваквиот тренд, постои ризик од дополнително стеснување на демократскиот простор и поларизација во општеството.
