Ранѓеловиќ: ЕУ стана алатка за манипулација – Нашите политичари не сакаат искрено влез во Унијата
„Доколку утре влеземе во ЕУ, што ќе ни значи тоа ако не сме спремни? Членството не е дестинација, туку патување низ реформи кои на нашите политички елити не им одговараат“
Додека државниот врв бара „брза лента“ за интеграција во Европската Унија, политикологот Иво Ранѓеловиќ во „Ноќно студио“ на 4TV.mk предупредува дека македонското општество и политичката елита паднале во стапицата на декларативни заложби, додека суштинскиот реформски процес стагнира повеќе од три децении.
Според Ранѓеловиќ, најголемата грешка е што на членството во ЕУ се гледа како на финална цел која автоматски ќе ги реши сите проблеми. Тој посочува примери на земји-членки кои и понатаму се најсиромашни во блокот.
„Членството во ЕУ не е гарант за достоинствен живот. Реформскиот процес е она што ни е потребно – од економски до социјален план. Без разлика дали имаме формално членство или не, нас ни треба здраво општество ради самите себе, а не само ради Унијата“, истакна Ранѓеловиќ.
Политикологот е дециден дека секоја влада во Македонија ја користи интеграцијата како алатка за дневна политика и манипулација со народот, прилагодувајќи ги ставовите според тоа „како ќе дувне ветрот“.
„Се манипулира со тоа дали да побрзаме, дали да го дадеме името или не… Тоа е само алатка на актуелните власти. Народот треба јасно да знае: дури и да ги исполниме сите услови, во овој момент во самата ЕУ нема формална политичка волја за проширување“, појаснува тој.
Ранѓеловиќ изнесе остра критика до политичката елита, тврдејќи дека тие суштински не сакаат влез во Унијата бидејќи тоа би значело крај на досегашниот начин на владеење.
„Не верувам во искреноста на политичарите. Вистински реформски процес би ги оневозможил корупцијата и ставањето на личниот интерес над државниот. Во една уредена средина со европски правила, нашите политичари едноставно не би знаеле како да функционираат. Затоа веќе 35 години живееме во овој статус-кво“, заклучува Ранѓеловиќ.
