Ангела Николовска од Доха: Денеска е мирно, македонската амбасада работи на можност за евакуација
Ангела Николовска, која се наоѓа во Доха, во вклучување во емисијата Ноќно студио на 4TV.mk изјави дека безбедносната состојба денеска е значително помирна во однос на претходните денови.
„Денеска е мирно. Ова е прв ден да не се разбудиме од детонација. Имавме само еден напад околу 19 часот, со пет-шест детонации, но проектилите беа пресретнати од Министерството за одбрана и се надевам дека за денеска тоа е завршено“, рече Николовска.
Во однос на информирањето на граѓаните, таа посочи дека внимателно ги следи официјалните канали на катарските институции.
„Јас лично ги следам објавите на локалните медиуми и официјалните профили на Министерството за одбрана, Министерството за внатрешни работи и Министерството за надворешни работи на Катар. Тука е законски забрането ширење лажни вести, така што информациите што се објавуваат се официјални и проверени“, истакна таа.
Николовска ја пренесе и најновата информација од македонските институции, според која Министерство за надворешни работи и надворешна трговија на Северна Македонија соопштило дека Амбасадата на Северна Македонија во Абу Даби, во координација со локалните власти во Обединети Арапски Емирати, работи на финализирање на деталите за организација на комерцијален лет за евакуација на македонски државјани.
Се повикуваат сите граѓани кои се заинтересирани за евакуација, а сè уште не се пријавиле, тоа да го сторат во најкраток можен рок преку контакт со амбасадата во Абу Даби.
Според Николовска, поголем дел од македонските државјани во Доха се лица кои се таму подолг период поради работа и живот, додека помал број се во транзит или привремено затекнати поради откажани или пренасочени летови.
Таа посочи дека стапила во контакт со македонската амбасада, при што ѝ било пренесено дека катарските власти засега не препорачуваат организирање евакуација од територијата на Катар.
„Катарските власти не само што не препорачуваат, туку и инсистираат засега да не се организира евакуација, особено не преку соседни држави. Тие гарантираат дека состојбата е безбедна. Во моментов, во македонската амбасада во Катар се пријавуваме само за евиденција, а не за евакуација“, изјави Николовска.
Таа додаде дека ситуацијата внимателно се следи и дека евентуалните одлуки ќе зависат од понатамошниот развој на безбедносните околности.
