Ранѓеловиќ за 4TV.mk: Наместо бланко поддршка за војни, Македонија треба да избере внимателна и мирољубива дипломатија
Политикологот Иво Ранѓеловиќ во гостување во емисијата Ноќно студио на 4TV.mk оцени дека дел од светот, вклучително и Македонија, избрзал со јасни и безрезервни позиции во однос на актуелните воени конфликти, наместо да демонстрира повнимателен дипломатски пристап.
„Не само ние, мислам дека добар дел од светот избрза. Не можам да поверувам како обичен граѓанин дека може политичар на функција, од било која држава, да излезе и да оправдува било каква воена инвазија и агресија“, изјави Ранѓеловиќ.
Според него, оправдувањето на војна не е ниту човечки, ниту политички оправдано, особено доколку државата нема директна политичка нужност или стратешки интерес да се вклучи со јасна страна. Тој нагласи дека Македонија, како мала држава со ограничено влијание на глобалната сцена, треба да биде особено внимателна во услови на „рекомпонирање на светскиот поредок“ и создавање на нов мултиполарен свет.
„Во најмала рака треба да сме внимателни. Не гледам потреба да се дава бланко поддршка – не само кон САД, туку кон било која држава. Дипломатскиот дискурс треба да биде поинаков, повнимателен, можеби не толку воздржан колку неодреден, односно покултурен“, смета Ранѓеловиќ.
Тој потенцира дека успехот на дипломатијата не се мери преку поддршка на воена доминација, туку преку способноста да се предвидат долгорочните последици од одредена воена интервенција.
„Успехот е да ги предвидите последиците. Што ќе донесе таа воена агресија на долг рок? Врз основа на тоа треба да се засноваат и нашите изјави и нашата надворешна политика“, истакна тој.
Во своето излагање, Ранѓеловиќ направи паралела со повеќе воени интервенции во изминатите децении, вклучително и агресијата на Русија врз Украина, како и интервенциите на САД во Ирак, Либија и поранешна Југославија. Според него, ниту една агресија не треба да се оправдува, особено од држави кои не се директно засегнати.
Тој изрази сомнеж дека безрезервната поддршка кон одредени глобални актери ќе резултира со конкретна и долгорочна корист за Македонија, оценувајќи дека изборот на страна не секогаш носи политички бенефит.
„Не сум сигурен дека за таа поддршка што ја даваме ќе добиеме соодветен поврат. Во новиот мултиполарен свет се отвораат вакууми и нови сојузи, но не сум убеден дека избирањето страна автоматски значи успех“, заклучи Ранѓеловиќ, повикувајќи на поодмерена и стратешки поставена надворешна политика.
