Нема пролонгирање на распустот, учениците се враќаат во клупите на 20 јануари
Иако бројот на заболени од грип и вирози е во пораст, зимскиот распуст нема да биде продолжен. Министерката за образование и наука, Весна Јаневска, денеска потврди дека второто полугодие ќе започне според предвидениот рок – на 20 јануари.
При посетата на Универзитетот „Гоце Делчев“ во Штип, Јаневска беше децидна дека нема причини за одложување на наставата во основните и средните училишта.
Министерката најави дека се очекува и официјална потврда од надлежните здравствени институции.
Министерството за здравство и Институтот за јавно здравје треба да излезат со заеднички став дека не постојат епидемиолошки пречки за старт на учебната година.
Јаневска ја искористи приликата да упати порака до семејствата за важноста на континуитетот во образовниот процес.
