Нема да се намали ДДВ-то за дизелот!
Во услови на зголемено внимание кон цените на енергентите во регионот, премиерот Христијан Мицкоски изјави дека земјава и натаму има најниски цени на бензините и дизел-горивото, како резултат на намалените акцизи и понискиот ДДВ за бензините.
Одговарајќи на новинарско прашање, Мицкоски посочи дека во овој момент не се разгледува дополнително намалување на ДДВ за дизел-горивото. Тој се повика на податоци од Меѓународниот монетарен фонд, според кои државата се наоѓа меѓу првите три во Европа по обем на спроведени мерки во однос на бруто домашниот производ.
Премиерот нагласи дека поради пониските цени на горивата е забележано зголемено точење од страна на граѓани од соседните земји. Според него, во одредени денови потрошувачката расте и до 30 проценти, при што најчести посетители се граѓани од Србија, Косово, Албанија, Грција и делумно Бугарија.
Изјавата Мицкоски ја даде по присуството на панихида во Црквата „Св. Спас“ во Скопје, по повод 123 години од смртта на Гоце Делчев.
Тој информираше и дека во тек се инспекциски контроли поврзани со сомнежи за евентуален реекспорт на горива од одредени компании. Како што рече, проверките се спроведуваат врз основа на добиени информации од лица инволвирани во бизнис секторот, а надлежните институции ќе постапат согласно утврдените наоди.
