На денешен ден загина Гоце Делчев – симболот на македонската борба за слобода
На денешен ден загина Гоце Делчев – еден од најзначајните македонски револуционери и симбол на борбата за слобода и национално ослободување.
Гоце Делчев е роден на 4 февруари 1872 година во Кукуш, Егејска Македонија. Тој бил идеолог, организатор и еден од главните водачи на македонското револуционерно националноослободително движење кон крајот на XIX и почетокот на XX век.
Како личност на своето време, Делчев ги претставувал стремежите на македонскиот народ за ослободување од османлиската власт и создавање слободна Македонија.
Загина во пресрет на Илинденското востание, на 4 мај 1903 година, во селото Баница, Егејска Македонија, во борба со османлиската војска која го опколила селото.
Неговите посмртни останки на 11 октомври 1946 година биле пренесени од Бугарија во тогашна Народна Република Македонија. Денес неговиот саркофаг се наоѓа во црквата „Свети Спас“ во Скопје, каде бројни граѓани и делегации му оддаваат почит.
