МИТОВСКИ ПРЕДУПРЕДУВА: Народот е разочаран од системот, се раѓа простор за нова силна политичка опција
Македонското општество се наоѓа пред точка на вриење, а разочарувањето од политичките елити и системските дефекти може да резултира со раѓање на нова, силна политичка алтернатива. Ова го истакна градоначалникот на Крива Паланка, Сашко Митовски, во анализата на актуелните состојби во емисијата на 4ТВ.
Според Митовски, јазот помеѓу политичките партии и потребите на обичниот човек станува сè подлабок. Тој потенцира дека граѓаните веќе не бараат само промена на власта, туку коренита промена на начинот на кој државата функционира.
„При секојдневната комуникација со граѓаните, гледам дека сите се разочарани – и од системот, и од политичките партии за жал. Тој тренд на незадоволство само ќе расте во државата“, вели Митовски.
Градоначалникот упати директна критика кон политиките на централната власт, нарекувајќи ги „погубни“ за интересите на граѓаните. Тој смета дека токму ваквиот начин на владеење го подготвува теренот за појава на нов политички субјект кој би ги обединил незадоволните гласачи.
„Искрено, можеби моментот ќе биде да се роди некаква силна опција во наредниот период, која би значела вистинска алтернатива на сето ова што ни се случува од страна на централната власт во моментот“, дециден е првиот човек на Крива Паланка.
Иако Митовски во текот на интервјуто се залага за внатрешна консолидација на својата партија, тој не ги затвора очите пред реалноста дека граѓаните сè почесто излезот го бараат во апстиненција или во очекување на „трета опција“. За него, главниот виновник за оваа состојба е неспособноста на институциите да одговорат на реалните проблеми, што создава опасен вакуум на политичката сцена.
Со оваа изјава, Митовски практично ја потврдува тезата дека Македонија влегува во период на политичка трансформација, каде старите партиски матрици веќе не го даваат посакуваниот одговор кај гласачкото тело.
