КРИВА ПАЛАНКА ПОВТОРНО ЦЕНТАР НА БАЛКАНОТ: Митовски најавува мега-ѕвезда за 29 август
По серијата тешки политички и инфраструктурни теми, градоначалникот на Крива Паланка, Сашко Митовски, го заврши своето гостување во „Ноќно студио“ на 4ТВ со ведри вести за претстојната летна сезона. Тој најави дека градот под Осогово и оваа година ќе го задржи статусот на културно жариште, привлекувајќи гости од целата држава и регионот.
Митовски истакна дека високата реализација на буџетот во делот на културата веќе го дава својот резултат преку целосно променетиот имиџ на Крива Паланка. Според него, културната понуда повеќе не е само забава, туку сериозен поттик за локалниот економски развој.
„Особено ми е драго што успеавме да го промениме јавното мислење за тоа што го работи општината во културата. Сето она што го правиме е во функција на локалната економија – носиме туристи, ги полниме угостителските објекти и го промовираме градот на меѓународно ниво“, изјави Митовски.
Подготовките за „Кривопаланечкото културно лето“ се во полн ек. Програмата традиционално започнува на крајот на јуни и ќе понуди разновидни содржини во текот на јули и август. Митовски потсети дека во изминатите години Крива Паланка успеа да ги донесе најголемите балкански имиња, нешто што го издвојува градот од останатите општини во Македонија.
Главниот фокус на јавноста е насочен кон празникот на градот во август. Иако градоначалникот остана таинствен за името на главниот изведувач, тој откри клучни детали за настанот.
„Преговараме за ѕвездата која ќе ја донесеме за празникот на градот. Главниот музички настан ќе се одржи на 29 август (сабота). Ќе почекаме уште две до три недели за официјално да го потпишеме договорот и да го објавиме името во јавност. Но, ве уверувам, и овој пат нема да ги разочараме нашите поддржувачи – носиме мега-ѕвезда која ќе ја направи Крива Паланка центар на вниманието“, најави Митовски.
Со оваа најава, Крива Паланка јасно става до знаење дека и ова лето ќе биде главна дестинација за љубителите на добрата музика и квалитетната културна понуда, ветувајќи уште една ноќ за паметење на градскиот плоштад.
