Мицкоски за новиот закон за високо образование: Крај на експериментите, најдобрите студенти добиваат предност за вработување на државните факултети
Новото законско решение за високо образование има за цел да стави крај на повеќегодишните импровизации, да го подигне квалитетот на универзитетите и да ги задржи младите во државата. Ова го порача премиерот Христијан Мицкоски во своето обраќање пред академската заедница, најавувајќи системски решенија и историски највисок буџет за високото образование.
Премиерот најави конкретни мерки со кои државата ќе се обиде да го спречи одливот на мозоци и да го подмлади академскиот кадар:
За реализација на овие реформи, Владата оваа година издвоила буџет од 7,5 милијарди денари за универзитетите, што според премиерот претставува значително зголемување во однос на минатото, со ветување дека овој тренд ќе продолжи.
Особена поддршка ќе се насочи кон научната дејност, зголемувањето на цитираноста и меѓународната видливост на трудовите. Крајната цел е македонските универзитети да забележат суштински напредок на реномираната Шангајска ранг-листа, која е главен глобален репер за квалитет во високото образование.
Остро критикувајќи го претходното законско решение донесено во 2018 година, Мицкоски оцени дека тоа предизвикало големи штети, носејќи намалени прагови за напредување во звања и помала научна продукција.
Тој нагласи дека новиот закон не е донесен зад затворени врати, туку низ широка дебата и партнерство со универзитетите, експертите и студентите, процес кој го предводеше министерката за образование и наука, Весна Јаневска.
„Дојде време да престанеме со експерименти и да почнеме со системски решенија. Ако продолжиме на овој начин да функционираме ќе ги изгубиме младите и да не се чудиме зошто илјадници студираат на универзитетите во регионот. Ова не е политичко прашање, ова е прашање коешто треба да ја определи иднината на оваа држава“, заклучи премиерот.
