Мицкоски потврди: Арбен Фетаи заминува во Брисел, реконструкцијата на Владата кон крајот на мај

Премиерот Христијан Мицкоски во интервју за ТВ Сител најави промени во извршната власт, потврдувајќи дека Арбен Фетаи повеќе нема да биде министер за добро владеење и транспарентност. Според Мицкоски, Фетаи лично го информирал дека својата професионална иднина ја гледа надвор од владиниот состав, по што е донесен заеднички заклучок дека неговото искуство и контакти ќе бидат искористени во Брисел.

„Разговаравме лично пред неколку недели. Тој изрази желба да се врати во Брисел, со оглед на неговото образование и искуство во тамошните институции. Сметам дека би било одлична можност тој да дејствува како специјален пратеник во Европскиот парламент или бриселската администрација“, изјави премиерот.

Во однос на пошироката реконструкција на Владата, Мицкоски посочи дека таа најверојатно ќе се случи во втората половина на мај или почетокот на јуни. Тој најави „холистички пристап“ кој ќе опфати не само промена на кадри, туку и можна ротација на цели ресори меѓу коалициските партнери. Моментално, премиерот е фокусиран на внатрешното реорганизирање во ВМРО-ДПМНЕ, кое треба да заврши до средината на мај.