Рускоска за 4ТВ: Враќање на името е невозможна мисија
Коментирајќи ги политичките ветувања за враќање на старото уставно име на државата, поранешната обвинителка Вилма Рускоска вечерва во емисијата Ноќно студио на 4ТВ повика на реализам наместо на популизам.
Таа смета дека со потпишаните меѓународни договори, патот назад е затворен.
„Да бидеме реални, апсолутно нема шанси за враќање на името. Тоа се меѓународни договори, признати и потпишани под меѓународно покровителство. Не постои влада или политичар кој може и кој ќе го направи тоа“, децидна е Рускоска.
Рускоска заклучи дека патриотизмот не се мери со кочење на процесите, туку со храброст да се донесат одлуки кои ќе им овозможат на новите генерации да живеат во европска и просперитетна држава. Според неа, Македонија мора да најде сила да ги надмине историските трауми за да не ја пропушти последната шанса за интеграција.
