Мицкоски: И покрај критиките од вчера, стојам на ставот дека Македонија е преубава земја и дека има прекрасни езера, планини и села!
Премиерот Христијан Мицкоски денеска изјави дека во тек се билатерални преговори во однос на системот за влез и излез во Европската Унија (ЕЕС), при што Владата очекува да се најде сеопфатно и долгорочно решение за олеснување на движењето на граѓаните.
Одговарајќи на новинарски прашања, Мицкоски посочи дека разговорите се одвиваат на повеќе нивоа и изрази очекување дека постојните бариери ќе бидат надминати преку договори меѓу засегнатите страни.
„Се водат преговори и врз основа на нив ценам дека на билатерално ниво ќе бидат надминати овие пречки, но не само за летниот период, туку бараме генерално решение“, изјави Мицкоски.
Тој додаде дека не сака политичките теми да се претвораат во јавна „естрада“, нагласувајќи дека фокусот треба да биде на конкретни решенија и реални резултати.
Мицкоски се осврна и на критиките од претходниот ден, повторувајќи дека останува на својот став за потенцијалот на државата за туризам и домашна понуда.
„Иако вчера имаше одредени кругови кои се обидоа да ме исмејат за тоа што го кажав, јас уште поцврсто стојам на ставот дека Македонија е преубава земја и дека има прекрасни езера, планини, села, што ќе можат да се посетат за време на летниот одмор. А има таков тип на луѓе кои повторно ќе ме исмејат, но јас повторно уште поцврсто стојам на својот став“, нагласи Мицкоски.
