Маратон на издржливост: до 48° во Сицилија, 15 дена во САД над 43°, жешко и во Јапонија
Се очекува рекордна топлина низ целиот свет – од САД, каде десетици милиони луѓе се борат со опасно високи температури, до Европа и Јапонија, пренесе Франс прес.
Викендов во Италија се очекуваат рекордно високи температури, објавена е црвена шифра за 16 градови во земјата. Меѓу нив се Рим, Болоња и Фиренца. Метеоролошката служба ги предупреди Италијанците да се подготват за „најинтензивниот топлотен бран на летото и исто така еден од најинтензивните на сите времиња“.
До понеделник температурите во Рим би можеле да достигнат 40 степени, а во вторник следната недела дури 43 степени, надминувајќи го рекордот од 40,5 степени од август 2007 година. Топлината на италијанските острови Сицилија и Сардинија може да достигне 48 степени, предупреди Европската вселенска агенција. Ова се „потенцијално највисоките температури некогаш забележани во Европа“.
Од горештините е зафатена и Грција, а националната метеоролошка служба соопшти дека температурите денеска во делови од земјата би можеле да достигнат до 44 степени, а Акропол и неколку паркови во грчката престолнина затворени во најтоплите часови од денот.
Високи температури се очекуваат и во некои региони во Франција, Германија, Шпанија и Полска.
Се очекува утре и понеделник температурите во некои делови на источна Јапонија да достигнат од 38 до 39 степени. Според јапонската метеоролошка агенција, жештините би можеле да достигнат претходни рекорди.
Соединетите Американски Држави се исто така зафатени од опасен топлотен бран кој се протега од Калифорнија до Тексас, а највисоките температури се очекуваат овој викенд.
Во Аризона, една од најпогодените држави, локалните жители се соочуваат со дневен маратон на издржливост против сонцето. Според податоците на американската Национална метеоролошка служба, температурите во главниот град на државата Феникс се над 43 степени Целзиусови веќе 15-ти ден по ред.
Метеоролошката служба во Лас Вегас, каде што утре се очекуваат и рекордно високи температури, ги предупреди локалните жители да не ја помешаат топлината природно поврзана со климата во пустината во областа со типична пустинска топлина.
Познатата долина на смртта во Калифорнија, едно од најжешките места на земјата, се очекува и утре да забележи нови рекордни високи температури, кога живата би можела да се искачи до 54 степени. Јужна Калифорнија исто така се бори со повеќе мали шумски пожари.
