Канаѓанец снимал деца во Ровињ со камера скриена во термос

Полицијата во Ровињ спровела кривична истрага и утврдила сомнение дека 63-годишен канадски државјанин сторил кривично дело експлоатација на деца за порнографија.

Пред два дена, на 16 август, околу 18 часот и 45 минути, гостите на туристичкиот камп во областа Ровињ забележале маж како се задржува во близина на базен со тобоган каде си играат деца, а со себе имал мобилен телефон и термос шише.

Неговото однесување предизвикало сомнеж кај гостите дека снима деца, а кога му пришле мажот почнал да бега. Гостите на кампот успеале да го спречат и да повикаат полиција, а полицајците го уапсиле мажот под сомнение дека снима голи деца. При бегството, осомничениот маж бил полесно повреден, соопшти полицијата.

Полициски службеници на пријавениот му пронашле мобилен телефон и камера која била скриена во шише со термос, а по наредба на надлежниот суд извршиле претреси и нашле инкриминирачка содржина.

Претресено е и возилото со германски регистарски број што го користел 63-годишниот маж, а при претресот на возилото, полициски службеници пронашле и одземале лаптоп компјутер, таблет, уреди за складирање мултимедијални содржини со USB и други предмети што ќе се испитуваат во наредните денови.