ОПШТИНА КРИВА ПАЛАНКА УСПЕАЛА ДА ЗАЛОВИ 96 ОД ВКУПНО 1.000 „РАСПУШТЕНИ“ КРАВИ Градоначалникот поднесе кривични пријави против службеници на АХВ
Агенцијата за храна и ветеринарство досега заловила вкупно 96 говеда во Крива Паланка, но проблемот со кравите што неконтролирано се движат низ градот и околните села сè уште не е решен. Од АХВ велат дека преземаат активности за заловување на животните, но се соочуваат со непристапен терен и опструкции од поранешните сопственици.
– Агенцијата за храна и ветеринарство спроведува активности за справување со проблемот со говедата, односно нивно заловување и покрај предизвиците со кои се соочува – непристапен терен и опструкции од поранешните сопственици – велат од АХВ за „Фокус“.
Оттаму додаваат дека во координација со надлежните институции и локалната самоуправа бараат одржливо решение, при што треба да се води сметка и за безбедноста и здравјето на луѓето и за благосостојбата на животните.
Во меѓувреме, градоначалникот на Крива Паланка, Сашко Митовски, заедно со жители од засегнатите села, поднесе неколку кривични пријави против службени лица во Агенцијата за храна и ветеринарство и Агенцијата за управување со одземен имот.
Пријавите се однесуваат на сомневања за злоупотреба на службената положба, неспроведување на правосилните и извршни решенија за одземање на добитокот, како и загрозување на безбедноста и здравјето на граѓаните.
– Бараме да се испита одговорноста на надлежните службени лица во Агенцијата за храна и ветеринарство и Агенцијата за управување со одземен имот – информира Митовски.
Општината поднела и претставка до Државната комисија за спречување на корупцијата, со барање да испита дали во случајот има елементи на корупција, како и барање за вонреден инспекциски надзор до Државниот управен инспекторат поради неспроведувањето на решенијата.
Митовски неодамна побара Владата да прогласи 30-дневна кризна состојба за да се овозможи решавање на проблемот. Според неговите процени, низ Крива Паланка и околните населени места слободно се движат околу 1.000 говеда.
крива паланка, крави, сашко митовски, ахв, кривични пријави, заловување добиток, безбедност на граѓаните
Мета-опис: АХВ досега заловила 96 говеда во Крива Паланка. Градоначалникот Сашко Митовски поднесе кривични пријави поради неспроведување на решенијата за одземање на добитокот.
.
Извор: plusinfo.mk