Избрани тројца кандидати за судија во Стразбур
Комисијата за избор на кандидат на Република Северна Македонија за судија во Европскиот суд за човекови права (ЕСЧП) во Стразбур утврди тројца кандидати кои ќе бидат испратени на разгледување до експертскиот панел на Советот на Европа. Предложени се адвокатите Јордан Апостолски и Наташа Бошковска, како и професорот Сашо Георгиевски.
На прес-конференцијата, претседателот на Уставниот суд, Дарко Костадиновски, соопшти дека одлуката е донесена врз основа на критериумите за висок морален интегритет, професионални квалификации за вршење судиска функција и признат правнички углед.
„Мал број од кандидатите го исполнуваа условот за квалификации за извршување судиска функција. Професорот Георгиевски е препознаен како угледен стручњак, а двајцата адвокати имаат значајно искуство во областа на човековите права“, наведе Костадиновски.
Гласањето било спроведено тајно. Двајца од предложените кандидати добиле по пет гласа, а еден кандидат освоил четири. До крајот на неделата, листата ќе биде испратена до експертскиот панел на Советот на Европа, кој ќе ја даде конечната оценка.
„Кога ќе го добиеме одговорот, ќе ја известиме Владата дали изборот добил зелено светло или не. Во зависност од тоа, постапката ќе продолжи“, рече Костадиновски. Тој појасни дека по известувањето, Владата ја поднесува листата до Комитетот при Советот на Европа, кој потоа спроведува интервјуа со кандидатите. По интервјуирањето, предлогот оди на пленарен состанок на Советот на Европа. Следната пленарна седница е во јануари, а наредната во април, за што, како што рече, се очекува до тогаш да биде завршена постапката.
Меѓу кандидатите што се пријавија, но не беа избрани, се и Оља Ристова, Тони Менкиноски, Наташа Габер, Александар Даштевски, Али Алиу, Илир Исени, Јелена Ристиќ и Ана Дангова Хуг.
Костадиновски додаде дека Комисијата постапувала согласно насоките од Државната комисија за спречување на корупцијата, која претходно укажа на можни ризици од судир на интереси. По одлуката на ДКСК, дел од членовите за кои било побарано изземање се изземаа од гласање за одредени кандидати.
Владата во јули ја поништи претходната листа и формира нова Комисија со петмина членови: претседателот на Уставниот суд Дарко Костадиновски, претседателот на Врховниот суд Африм Фидани, претседателката на Основниот кривичен суд Даниела Димовска, претседателот на Основниот граѓански суд Бесник Авдија и директорката на Академијата за судии и јавни обвинители Ирина Трајкоска Стрезоски.
