Гутереш го осуди Израел за смртта на Палестинците во Газа
Генералниот секретар на ОН Антонио Гутереш го осуди Израел за „трагичната“ смрт на палестинските жители во Газа. Тој изјави дека е неприфатливо Израел да не дозволува палестинскиот народ да формира своја држава, пренесе Ројтерс. Според него, на овој начин „конфликтот ќе се продолжува бескрајно, што станува голема закана за мирот и безбедноста во светот“.
„Воената операција на Израел донесе уништување и уби цивили во невиден обем за време на мојот мандат како генерален секретар“, рече Гутереш на почетокот на состанокот Г77-Кина во главниот град на Уганда, Кампала.
„Ова е срцепарателно и целосно неприфатливо. Блискиот Исток е жариште и мораме да направиме се за да спречиме ескалација на конфликтот“, објасни Гутереш.
Израел започна офанзива во Газа по нападот на радикалната група „Хамас“ на 7 октомври. Оттогаш, според Израел, повеќе од 1.200 луѓе се убиени, а 240 Израелци се земени како заложници.
За време на израелската воена операција, повеќе од 25.000 Палестинци се убиени, соопшти денеска Министерството за здравство во Газа, а повеќето од 2,3 милиони жители на енклавата се раселени. Во текот на војната, израелската војска изрази жалење за цивилните жртви, но го обвини Хамас дека дејствува во густо населените области и користи цивили како жив штит, обвинение што групата го негира.
Гутереш додаде дека одбивањето на Израел да прифати решение со две држави за Израелците и Палестинците е апсолутно неприфатливо.
Израелскиот премиер Бенјамин Нетанјаху вчера го изрази своето несогласување со американскиот претседател Џо Бајден кој најави формирање на палестинска држава по завршувањето на војната против Хамас. Неговата канцеларија „повтори дека по уништувањето на Хамас, Израел мора да ја преземе контролата врз Газа за да се осигура дека Газа повеќе не е закана за Израел – барање што е спротивно на палестинскиот суверенитет“.
Гутереш беше во Кампала за да учествува на самитот на Г77 со Кина и Движењето на неврзаните. На состанокот присуствуваа лидери и високи претставници од десетици земји, вклучително и Јужна Африка, Иран, Кина, Турција, Куба, Индија, Виетнам и други земји.
Г-77 плус Кина е група од 134 земји во развој кои ги прифаќаат заедничките интереси на земјите од глобалниот југ. Документот, објавен синоќа на крајот од состанокот на Движењето на неврзаните, вклучуваше осуда на „нелегалната израелска воена агресија во Појасот Газа, неселективните напади врз Палестинците, цивилните објекти и принудното раселување на палестинското население“. и повика на итно и трајно хуманитарно примирје.
